La 38 Selmana de les Lletres rinde homenaxe a les muyeres escritores

Cultura edita una antoloxía de 92 escritores n'asturianu y gallego-asturianu

La Selmana de les Lletres Asturianes, que se va celebrar del 27 d'abril al 9 de mayu va rindir homenaxe nesta trentena octava edición al papel de les muyeres na lliteratura asturiana.

Sol lema "Lletres, femenín plural", entamáronse una ventena d'actividaes, como presentaciones de llibros, llectures públiques, certames lliterarios, alcuentros escolares, entregues de premios, visites guiaes, conciertos y representaciones teatrales que se van llevar alantre en siete conceyos asturianos y en Madrid.

La Selmana va entamar el próximu xueves cola celebración del Día de les Lletres Asturianes nel Esterior que, en collaboración cola Dirección Xeneral d'Emigración y Cooperación al Desarrollu, va llevar al Centru Asturianu de Madrid la presentación-recital del llibru Escritores asturianes. Antoloxía de testos n'asturianu y gallego-asturianu.

La obra colectiva, que recueye creaciones de 92 autores, va presentase tamién el xueves 4 de mayu n'Avilés, na V Feria del Llibru y Discu, y va regalase'l vienres 5 de mayu, Día del Llibru Asturianu, en 59 llibreríes, al mercar llibros y discos n'asturianu o gallego-asturianu.

El martes, 2 de mayu y el miércoles celebraránse visites guiaes en llingua asturiana pa dar a conocer a escolinos y adultos la Xunta Xeneral del Principáu, el barriu xixonés de Cimavilla y el cascu históricu d'Uviéu.

El día 2, el Parlamentu va acoyer tamién la llectura pública institucional de testos n'asturianu y gallego-asturianu.

Esi mesmu día, en collaboración col Institutu Asturianu de la Muyer y Polítiques de Mocedá programóse na Sala de Cámara del Auditoriu Príncipe Felipe l'actu Muyeres y lletres, un homenaxe a les escritores asturianes cola llectura dramatizada de testos y que va cuntar cola actuación de la cantante Anabel Santiago, ganadora del Premiu al Meyor Cantar de 2016.

Una selmana dempués, na Sala Borrón d'Uviéu, va celebrase la segunda edición d'Entaína a escribir, un concursu de microrrellatos improvisaos n'asturianu pa mozos.

En Grau, la Fundación Aula de les Metáfores va collaborar el día 3 na entrega de los diplomes del IV Premiu de Poesía que se convoca pal alumnáu d'esi conceyu, amás de participar cola llectura de poemes la poeta Ángeles Carbajal, ganadora del Premiu Xuan María Acebal de Poesía 2016.

Corvera va sumase tamién a les actividaes de la Selmana con un alcuentru poéticu'l día 3 nos centros culturales de Cancienes y Les Vegues, onde'l día 8 va celebrase tamién una representación teatral basada nos versos de Víctor Manuel.

La V Feria del Llibru y Discu n'asturianu, entamada col Conceyu d'Avilés y l'Asociación de Llibreríes del Principáu d'Asturies, va acoyer ente los díes 4 y 6 de mayu presentaciones de llibros, sesiones de cuentacuentos y alcuentros lliterarios. La Feria va tar allugada nuna carpa na plaza Domingo Álvarez Acebal.

El Teatru de Llaboral Ciudá de la Cultura va acoyer esi mesmu xueves la gala d'entrega de premios del IV Certame de Teatru Escolar, y al otru día, el Colexu Públicu Santiago Apóstol de Mieres va acoyer l'actu escolar institucional de celebración de la Selmana de les Lletres cola entrega de los premios de los certames artísticu y lliterariu.

Tamién pal públicu infantil diseñáronse los espectáculos Histories detectivesques y Esculpe, caballeru, nel Teatru la Llaboral, el llunes 8 y el martes 9 de mayu, respectivamente.

El gallego-asturianu va tar presente nel Auditoriu As Quintas, d'A Caridá (El Franco), el sábadu 6 de mayu, col Homenaxe ás nosas lletras, que nesta ocasión va consistir nuna adaptación especial del espectáculu País malva, al cargu de la Asociación Música Tradicional Muyeres.