La OSPA entama nel festival Temporada Darcos la so primer xira per Portugal

El conciertu n'Asturies sedrá'l xueves viniente nel Auditoriu Príncipe Felipe

La Orquesta Sinfónica del Principáu d'Asturies (OSPA) retoma la so axenda internacional nel festival Temporada Darcos, na que sedrá la so primer xira portuguesa, los díes 26 y 27 d'ochobre.

La OSPA ufiertará, cola batuta del director lisboeta Nuno Côrte-Real, un programa de música española, rusa y portuguesa, nel que tamién tocará'l pianista eborense António Rosado, informa la orquesta sinfónica asturiana.

El públicu asturianu tendrá la oportunidá de sentir esti conciertu'l xueves viniente, 24 d'ochobre, nel Auditoriu Príncipe Felipe a les 20:00, dientro de la so programación d'abonu y el maestru caltendrá un alcuentru col públicu enantes del conciertu (Sala de Cámara, 19:00).

La OSPA dará'l primeru de los conciertos del cartel Darcos nel Centro Cultural e Congressos de Caldas da Rainha, una famosa ciudá balneariu a 80 kilómetros de Lisboa, el día 26, a les 21:30, y al día siguiente, la orquesta asturiana tocará nel Centro Cultura de Belém, en Lisboa a les 17:00.