La casa natal del Padre Galo convertiráse na 'Casina de la traducción'

Necesita una serie d'obres pa que puea tar nes meyores condiciones

Entrar na casa natal del Padre Galo ye entrar nún d’esos llugares de paz lliteraria. La vivienda de Fernán Coronas, muertu va 82 años, ye ún de los atractivos de Cadavéu, que verá darréu como’l llar d’ún de los poetes más representativos d’Asturies convertiráse na 'Casina de la traducción'.

Nel so cuartu entá puen vese dalgunos de los sos poemes escritos na paré. Dalgunos de los cerca de 5.000 qu’escribió pero de los que s’asoleyaron al rodiu de 400. Gran impulsor de la llingua asturiana y de les traducciones.

La so casa convertiráse nun puntu d’alcuentru cultural pa entamar eventos de calter internacional al rodiu de conteníos lliterarios, artes plástiques, musicales o gastronómicos. Lo más urxente ye reparar los estrozos de la casa, qu’entá son abondos.

L’Ayuntamientu de Valdés y la Conseyería de Cultura trabayen agora a comuña pa qu’esa 'Casina de la traducción' seya darréu una realidá y que’l primer eventu que se celebre equí seyan les xornaes de la traducción al asturianu.