La escritora Premiu Princesa de les Lletres visita l'IES Alfonso II nun alcuentru con 172 estudiantes

Siri Hudsvedt: "Naide pue torgar que lleas lo que t'interesa"

La escritora Siri Hustvedt, Premiu Princesa d'Asturies de les Lletres, alvirtió güei que "hai munchu trabayu por facer" pa romper l'enclín qu'entá esiste de "denigrar" el trabayu de les muyeres frente al que faen los homes.

La novelista, ensayista, poetisa y estudiosa feminista estadounidense fizo esta reflexón nun alcuentru celebráu nel IES Alfonso II d'Uviéu nel que participaron 172 alumnos de tercer y cuartu cursu de la ESO y Bachilleratu de 34 centros educativos d'Asturies.

Al ser entrevistada por dellos mozos, Hustvedt (Minnesota, 1955) llamentó qu'anguaño tiéndese a sobrevalorar el trabayu de los homes y a infravalorar el que desempeñen les muyeres, anque la calidá de les sos obres "seyan iguales".