La temporada d'Ópera necesita completar l'aforu permitíu pa caltener un equilibriu presupuestariu

Celestino Varela pide a les alministraciones un esfuerzu estraordinariu pa salvar esta situación

La temporada d’Ópera necesita completar l’aforu permitíu pa caltener un equilibriu presupuestariu. De nun ser asina, alcontraríase nuna situación delicada, dempués de que l’añu pasáu la so previsión d’ingresos menguare un 20%. El so director, Celestino Varela, pide a les alministraciones un esfuerzu estraordinariu pa salvar esta situación.

La ópera llevanta’l telón con un güeyu na calculadora y tirando de fondu d’armariu, con títulos populares y producciones propies. Les restricciones sanitaries actuales imponen un aforu máximu del 75% que, aplicáu al patiu de butaques del Teatru Campoamor, mengua hasta’l 60%.

Con estos márxenes, la temporada necesita completar l’aforu pa caltener un equilibriu presupuestariu.

De ser asina, alcontraríase nuna situación delicada dempués de que l’añu pasáu perdiere cerca de 400.000 euros al ver amenorgada la so previsión d’ingresos nun 20%. Un furacu que tratarán d’abordar con ayudes estatales, anque Varela pide tamién a les alministraciones asturianes un esfuerzu estraordinariu.

La incógnita a despeyar ye la rempuesta del públicu, que dende la organización confíen en que seya positiva.

Enagora, la venta d’abonos va bien, anque la d’entraes en taquiya -desigual según el títulu- necesita en xeneral un emburrión.