La vixilia ye un placer nos bares uvieínos gracies a los Bocaos del Cofrade

Más de 30 establecimientos darán estos pinchos hasta’l día 21

Vivir una Selmana Santa gastronómica ensin saltar la vixilia yá ye posible n’Uviéu, onde se celebren les xornaes de Bocaos del Cofrade.

Un total de 31 establecimientos de la capital ufierten estos díes gran variedá de pinchos. Como’l ‘Tri-parti-zero’, un gofre de calabaza y pulpu, o’l ‘Mar de Asturias’, col que se pue degustar el sabor de la mar gracies a la so crema d’andarica, algues y atún coloráu. En toos ellos, la carne dexa de ser protagonista y, amás, en dalgunos casos el so diseñu ta venceyáu cola Selmana Santa.

Estes xornaes allargaránse hasta’l 21 d’abril, l’últimu día pa que los comensales puean votar polos meyores pinchos. Dempués, OTEA dará’l capuchón d’oru, plata y bronce a los tres pinchos ganadores. Los establecimientos valoren esta iniciativa y aseguren que llama al turismu.