LlibrUviéu homenaxeará a Conchita Quirós y Alberto Polledo

La feria camudará d'asitiamientu pa instalase en La Plaza Porlier

La 27ª edición de LlibrUviéu, dempués de nun celebrase en 2020 por mor de la pandemia del COVID-19, homenaxeará a Conchita Quirós y Alberto Polledo, propietarios de dos de les llibreríes más renomaes de la capital asturiana, Cervantes y Santa Teresa, y finaos los meses pasaos de febreru y payares, respectivamente.

Nesta nueva edición la feria del llibru d’Uviéu camudará’l so asitiamientu pa instalase en La Plaza Porlier onde cuntará con 14 casetes que pondrán a la venta los exemplares, con un descuentu del 10%, al traviés d’un sistema de caxa única asina como una carpa destinada a les presentaciones y un espaciu pa les robles d’autores.

Ente los autores que participarán nesta edición tán Víctor del Árbol, Juan Ramón Lucas, Fernando J. Múñez, Men Marías, Jorge Molist, Carmen Gallardo, José Calvo Poyato, Manuel Montalvo o Gonzalo Giner asina como los asturianos Aitana Castaño, Leticia Sánchez Ruiz, David Barreiro, Dorita García, Toño Huerta, Juanjo Arrojo y Ovidio Parades, ente otros.