Más d'un centenar d'estudiantes reciben orientación na ONEO

Ye una rede de collaboración y atención personalizada pa una inclusión plena na vida universitaria

Los estudiantes con discapacidá o con necesidaes específiques de la Universidá d'Uviéu tienen na Oficina d'Atención a Persones con Necesidaes Específiques (ONEO), el sofitu necesariu pa completar los sos graos. La oficina collabora colos estudiantes dende la EBAU hasta que rematen les sos carreres. Empobina y facilita l'accesibilidá a 155 mozos.

Amás, desenvuelven programes de sofitu qu'impliquen a profesoráu y alumnáu y a los becarios d'acompañamientu o los mentores. Una rede de collaboración y atención personalizada pa una inclusión plena na vida universitaria.

A David Cosío dánse-y bien los idiomes. Ta en primeru de Llingües Modernes y, pel momentu, contentu cola elección. Un compañeru de clase ye'l so becariu d'acompañamientu.

Pablo Sanz estudia Medicina y trabaya nel llaboratoriu de la facultá. Ta mui agradecíu a la universidá porque, diz, facilíta-y enforma la vida. Nel so casu, una nacencia prematura causó-y problemes de movilidá.

Adrián Vázquez tuvo qu'abandonar los sos planes de ser técnicu deportivu porque una mancadura medular dexó-y afectáu un brazu y una pierna. Entós, decidió estudiar una carrera, Maxisteriu d'Educación Infantil. Una decisión que-y dexó dir a Roma con una beca Erasmus. Una esperiencia a la que convida, como voluntariu de la rede d'Erasmus d'Uviéu.

Toos ellos comparten les sos esperiencies pa qu'otros estudiantes con necesidaes específiques sepan qu'esiste una rede de sofitu.