Más del 80% de los neños creen que los políticos nun son de fiar y que namái-yos interesa’l dineru

Los neños opinen que los políticos nun son de fiar (créelo más del 80%), nun sienten a la ciudadanía, nin se preocupen de los asuntos que-yos afecta y namái s’interesen pol dineru (el 81,2%), según recueye’l Barómetru d’Opinión de la Infancia y l’Adolescencia 2019 d’Unicef.

El barómetru, presentáu la viéspora del Día del Neñu, amuesa les esmoliciones y opiniones de más de 8.500 neños d’ente 11 y 18 años de 133 centros educativos de toa España y "un interés altu" de los menores pola mayoría de les problemátiques sociales xunto a una desconfianza nes instituciones y nos representantes políticos, sobre manera a nivel estatal, que xube a midida que medren.

"Vemos que los nuestros problemes siguen ensin solucionase, nun nos gusta la educación que recibimos, los problemes nun s’arreglen y paez que nun-yos interesen a naide; debería averase más la política a la mocedá porque a nosotros paeznos daqué aburrío y aunque nun tenemos votu, podemos dar una visión diferente, somos ciudadanos y somos el futuru", esplicó Coral, una moza asturiana de 17 años na presentación de la investigación.

Nueve de cada 10 tán esmolecíos poles desigualdaes de xéneru, la violencia machista y la probeza

Cuasi nueve de cada 10 neños afirmen que-yos preocupa "bastante" o "a esgaya" les desigualdaes de xéneru y la violencia machista, el terrorismu y la probeza estrema y más del 80 % opina igual del racismu, les desigualdaes económiques, l’estrozu del mediu ambiente, la calidá de l’asistencia sanitaria y el paru.

A la escontra de los qu’a veces se piensa, manifiesten una menor esmolición pola presión social pa tener un aspectu físicu atractivu, anque algama’l 43% nes moces y el 28% nos mozos.

Otru asuntu que tamién interesa más a les moces ye’l respetu a la diversidá sexual, la violencia machista y los peligros que puen derivar d’un mal usu d’internet.

"Cuando salgo a la cai non solo me piden que nun consuma alcohol o droga, tamién que nun llegue tarde, que lo faga acompañada d’un mozu; tengo’l derechu a tener les mesmes condiciones que los mios amigos y a tar segura igual qu’ellos", llamentó Estíbaliz, que tien 17 años y vive en Bilbao. "Les moces tamos baxo un mieu que nun tienen los nuestros compañeros", amestó.

Son pesimistes al respective de la situación política y económica: namái unu de cada diez cree que pue meyorar a curtiu plazu. Les instituciones nes que confíen son les venceyaes a la ciencia, siguíes de les ONG y los cuerpos y fuerces de Seguridá del Estáu.

Finalmente, les profesiones qué más valoren son les del campu de la medicina y de la enseñanza (sobre manera Infantil y Primaria), xunto cola de policía, mientres que valoren bien poco la profesión de políticu, xunto cola de modelu y banqueru.

En xeneral, los neños, neñes y adolescentes infórmense y falen d’asuntos sociales y manifiesten un fuerte sentimientu de pertenencia a la so comunidá, cada vegada más a mayor edá, anque nun participen n’órganos d’infancia y adolescencia y nun se sienten mui motivaos a implicase en futuru na so comunidá y menos en política.