Mónica Rodríguez apuesta por trabayar pa que la mocedá nun pierda'l vezu de lleer

La novela 'Rey', de Mónica Rodríguez, ye Premiu Edebé de Lliteratura Infantil 2022

'Rey', de l’asturiana Mónica Rodríguez, ye Premiu Edebé de Lliteratura Infantil 2022. Nuna entrevista en TPA Noticies Matinal, Rodríguez asegura que la mocedá llee más que los adultos hasta una edá, y ye ehí onde hai qu’insistir pa que nun pierdan el vezu.

'Rey' ta basáu nuna historia real, d’un neñu rusu que dexa la so casa polos problemes d’alcoholismu de la so familia y ye criáu por una manada de perros. Ún de los retos de Mónica Rodríguez foi nun humanizar a los canes.

'Rey' ye una novela pa un públicu mozu, pero tuvo aceptación tamién ente los mayores. Mónica Rodríguez asegura qu’escribir pa un públicu infantil nun fai que se corte.

Ente los proyectos yá inminentes de la escritora asturiana ta’l so primer poemariu pa neños, que s’asoleyará en Méxicu.