Muerre a los 87 años Adolfo Barthe Aza

La so trayectoria tuvo marcada poles sos dos pasiones, la medicina y la política

El dermatólogu, ex-dirixente d'UCD y del CDS y ex-presidente de la Caxa d'Aforros d'Asturies, Adolfo Barthe Aza, morrió anueche n'Uviéu a los 87 años tres una llarga carrera médica y política na que foi conceyal y diputáu autonómicu.

Nació en 1929 en L.lena, fíu de farmacéuticos y miembru d'una familia mui numberosa, Barthe Aza estudió Medicina en Salamanca, Madrid y Valladolid onde se llicenció en 1954 y darréu algamó'l títulu de leprólogu, un ámbitu del qu'asoleyó estudios sobre les malateríes del Camín de Santiago.

Médicu d'empresa y dermatólogu del Estáu acabaría convirtiéndose nun espertu con más de cuarenta publicaciones científiques d'esa especialidá y dirixendo una consulta na capital asturiana.
La so carrera política entamó como conceyal d'UCD -partíu del que depués sedría presidente n'Asturies- nel Ayuntamientu d'Uviéu pa incorporase depués al CDS col que foi diputáu y vicepresidente de la Xunta Xeneral del Principáu.

Miembru del Real Institutu d'Estudios Asturianos y articulista na revista Cuadernos del Norte, ocupó tamién la presidencia de la Fundación que xestiona'l Muséu de Belles Artes d'Asturies y impulsó na so etapa como presidente de la Caxa d'Aforros la puesta en marcha de la Fundación Príncipe d'Asturies.

El 24 de setiembre de 1980, na ceremonia solemne de constitución de la Fundación presidida pol daquella Príncipe d'Asturies, Felipe de Borbón, y polos Reis, Barthe Aza abogó, como presidente de la Comisión Xestora, por que la institución recién nacida fuera dende entós "la segunda casa" pal actual monarca.

La capiya ardiente por Barthe Aza allugóse nel tanatoriu del Salvador y el so funeral celebraráse'l llunes a les 12:00 hores la mañana na ilesia del Corazón de María d'Uviéu, la ciudá que n'avientu de 2003 otorgó'l so nome a una plaza na Cai del Marqués de Gastañaga