Muerre la científica asturiana Margarita Salas

La investigadora morrió en Madrid por causa d'una parada cardiaca

La investigadora Margarita Salas, una de les principales referencies de la ciencia española nes últimes décades, finó güei a los 80 años.

Margarita Salas, trabayó xunto al Nobel Severo Ochoa na Universidá de Nueva York, desenvolvió'l so llabor investigador nel campu de la bioquímica y la bioloxía molecular, y yera académica de la Ciencia y de la Llingua d'España.

La investigadora morrió en Madrid  por causa d'una parada cardiaca, según informaron fontes del Conseyu Cimeru d'Investigaciones Científiques (CSIC).

Margarita Salas tenía 80 años pero inda taba n'activo y diba prácticamente a diario al so llaboratoriu nel Centru Nacional de Bioloxía Molecular Severo Ochoa, centru mistu del CSIC y la Universidá Autónoma de Madrid.

Tenía la categoría 'ad honorem', que dexa a los científicos siguir el so llabor investigador más allá de la edá establecida pa la xubilación.

La investigadora asturiana fuera galardonada colos principales premios científicos nacionales, ente ellos el 'Ramón y Cajal' d'Investigación Científica (añu 2000), el Premiu Nacional d'Investigación (2001), el Premiu Mapfre a 'Toa una vida Profesional' (2009) o'l Clara Campoamor del Conceyu de Madrid.

El pasáu añu Margarita Salas ganó'l Premiu Inventor Européu 2019, unu de los galardones internacionales más prestixosos, pol so trabayu pioneru en xenética y bioloxía molecular.

Esta tarde va ser treslladada al Tanatorio de la Paz.

Salas rompió numberosos techos de cristal a lo llargo la so carrera, asina, foi la primer muyer en presidir l'Institutu d'España, la primer española n'ingresar na Academia de les Ciencies d'EEXX y la primer científica n'entrar na Real Academia Española de la Lengua.