Procesiones marineres pola Virxe del Carmen

Homenaxes a los muertos na mar nos conceyos costeros asturianos

La Virxe del Carmen ye venerada sobre manera polos marineros, por eso en villes de mariña como Tapia, Avilés y Xixón celebraron la so festividá.

Nesta postrera, como yá ye tradición, l'Armada fizo la recepción a la virxe enantes de la celebración de la misa solemne en San Pedro. Nella participaron autoridaes civiles y militares.

Al acabar, y yá nel esterior, miles de persones esperaron a la salida de la Virxe a El Campo Valdés onde se celebró la tradicional ufrienda floral na alcordanza de los que morrieron na mar.

El día grande les fiestes de Tapia vívese con cientos de persones acompañando a la imaxe de la Virxe del Carmen percorriendo les cais de la villa marinera. Faise hasta'l cai onde, mirando a los barcos como manda la tradición, cantóse-y la Salve Marinera.

En Lluanco, una trentena de barcos arroparon a la Virxe del Carmen nuna procesión marítima que se celebró pela mañana por cuenta de la marea. En tierra, cientos de persones celebraron esti día festivu qu'axunta fervor y tradición marinera.

Un día d'alcordanza pa los profesionales de la mar y de devoción pa los miles de turistes que cada añu tornen a los sos pueblos.

Tamién San Esteban celebra'l so particular homenaxe a la Virxe del Carmen con una procesión marinera. Una procesión que s'entama dende fai más de 100 años y qu'impulsen les muyeres de familia marinera de la villa.

A bordu d'una embarcación, la Virxe percorrió la desaguada del Nalón ente San Esteban y L'Arena, pa bendiciles. La celebración remató con una ufrienda floral.