RPA estrena esti martes el podcast 'Las olas del 37'

Seis capítulos que recueyen les hestories d'asturianos que xubieron a los barcos del esiliu enantes de la cayida del Frente Norte

Cada martes, a les 23:00 en RPA va haber un capítulu nuevu. Cada miércoles, na nuesa web y redes sociales.

Nos meses previos a la cayida del Frente Norte hebo un éxodu masivu d'asturianos dende los cais d'Avilés, Xixón y Ribeseya. 'Las olas del 37' ye un podcast, un documentu sonoru que van poder escuchar en RPA, qu'analiza'l contestu históricu y recueye les hestories personales de dalgunos que lu vivieron en primer persona, fai 85 años, como la de Beatriz Cuesta, que trabayó nuna fábrica na URSS.

'Las olas del 37' recueye'l contestu históricu y el testimoniu de seis asturianos que xubieron a unu d'esos barcos del esiliu. Dalgunos yera la primer vegada que cuntaben la so hestoria.

Articuláu en seis capítulos, más unu estra a manera de creitos, tamién cunta cola so propia banda sonora. Lía Marcos y Charly Blanco fixeron versiones de cuatro temes venceyaos a esa dómina. Y un chisgu especial pa los represaliaos de la cultura cola inclusión de poemes.