Recreación de los cuerpos Parasimón

Dempués d’acabar el trabayu na fuesa, el proyectu siguirá nel llaboratoriu

Esti mediudía acabaron los trabayos nuna de les fueses de Parasimón. Agora’l proyectu siguirá nel llaboratoriu cola llimpieza y análisis de tolos restos alcontraos correspondientes a 12 cuerpos, asina como dalgunes de les sos coses personales, ente elles un aniellu con iniciales.

Un total de 10 espertos de la Sociedá de les Ciencies d’Aranzadi llevó alantre esti proyectu impulsáu pola Asociación de Familiares y Amigos Fueses de Parasimón.

Tamién queda pendiente’l trabayu de documentación pa esponelu de forma pública. Con esta, afitáronse los fechos cuntaos que pasaron nesti llugar a entamos de payares del 37.

Esta mañana siguieron llegando vecinos del conceyu d’Ayer en busca de rempuestes. Tamién familiares de Luis Cienfuegos que, dempués de más d’ocho décades, tán cada vez más cerca d’alcontrar a los sos antepasaos.

Dempués de tres díes de trabayos acaba esta fase, con miembros del equipu y familiares de Cienfuegos na mesma posición na que fueron enterraos, malapenes a un metru de profundidá. Agora l’asociación espera poder abrir la segunda fuesa alcontrada y documentada a pocos metros d’esti llugar.

Dende’l 2000, l’equipu de la Sociedá Vasca llevó alantre la exhumación de 500 fueses, unos 8.000 cuerpos.