Riaño pide consensu pa llograr la oficialidá 'ensin perda de tiempu'

El Campoamor acueye l'actu institucional de la 42 edición del Día de les Lletres Asturianes

El presidente de l'Academia de la Llingua Asturiana (ALLA), Xosé Antón González Riaño, aseguró esti vienres que l'usu oficial del asturianu namás pue garantizase al traviés d'una reforma del Estatutu d'Autonomía que la recueya y apeló a los grupos parlamentarios pa llograr el mayor consensu que dexe afitar la oficialidá "ensin perda de tiempu".

González Riaño asina lo punxo de manifiestu nel so discursu nel Teatru Campoamor d'Uviéu onde güei tuvo llugar l'actu institucional de la 42 edición del Día de les Lletres Asturianes y onde s'amosó enfotáu en que'l próximu añu puea celebrase una nueva edición llibre de pandemia y yá cola reconocencia de la oficialidá del asturianu.

Na so intervención recordó que nestos meses l'Academia caltuvo xuntes con tolos grupos parlamentarios, sacante Vox, nun clima de “respetu y diálogu francu” que, na so opinión, ye'l que necesita la dignificación de la llingua asturiana.