El Puertu, en Somiedu, Pueblu Exemplar d'Asturies 2021

Ye'l modelu de pueblu de monte que supo "adaptase a los nuevos tiempos"

El pueblu d'El Puertu, en Somiedu, foi premiáu güei col Premiu al Pueblu Exemplar d'Asturies 2021 por ser el modelu de pueblu de monte que supo adaptase a los nuevos tiempos, inclusive abandonando unu de los nicios identitarios de la cultura de los vaqueiros, como ye "l'alzada".

"Esto favoreció la creación y caltenimientu de paisaxe, una actividá ganadera importante y la permanencia de pareyes nueves, asegurando asina'l relevu xeneracional d'esta comunidá" , según reflexa l'acta del xuráu, fecha pública nel Hotel de la Reconquista d'Uviéu.

El Puertu ye un pueblín con mediu centenar de cases y menos de cien vecinos que ta asitiáu a cuasi 1.500 metros d'altitú nel suroccidente asturianu, na llende con Lleón, y que ta arrodiáu de montes qu'alluguen una de les mayores reserves d'osos pardos de tol país.

Esti galardón, concedíu pola Fundación Princesa y al qu'anguaño optaben 27 candidatures, lleva acomuñada la visita de los reis d'España un día dempués de la ceremonia d'entrega de los Premios Princesa d'Asturies nel Teatru Campoamor d'Uviéu.

El premiu, qu'anguaño cumple la so edición trenta y dos, ta destináu al pueblu, aldega, núcleu de población, espaciu paisaxísticu o grupu humanu que destacara de manera cimera na defensa y caltenimientu de la so redolada natural, ambiental, del so patrimoniu históricu, cultural o artísticu, n'iniciatives d'impulsu económicu y social o na realización d'obres comunales o otres manifestaciones de solidaridá sobresalientes.