Sergio G. Sánchez rueda dende’l llunes n’Asturies una serie pa Netflix

Piensa grabase en más de 40 localizaciones esteriores y n’estudios asturianos

El cineasta uvieín Sergio G. Sánchez entama’l llunes a rodar n’Asturies una serie pa Netflix. La previsión, según fontes del equipu, ye grabar hasta mediaos d’avientu en más de 40 localizaciones esteriores y n’estudios asturianos. El proyectu, que ye la quinta serie n’español de la plataforma dixital, llámase 'Alma'.

El director y guionista Sergio Sánchez vuelve a apostar por Asturies como plató natural. El rodaxe de 'Alma' entamará nes piscines del parque del Oeste, pero hasta mediaos d’avientu percorrerá hasta 40 localizaciones.

L’equipu tará en playes como la de Porcía o Moniello y en conceyos como Xixón, Uviéu, Ribeseya, Casu o Valdés. La intención ye grabar interiores nel Centru de Producción Audiovisual de Lluniego y nos estudios que la productora de Juan Gona construyó n’Argame, en Morcín.

El creador de 'El Secreto de Marrowbone' propón una nueva historia del so universu: la ficción fantástica. Esta vegada, la protagonista ye una adolescente que sobrevive al accidente d’autobús que sufren los sos compañeros d’institutu.

'Alma' despierta nun hospital ensin recuerdos y nun ambiente misteriosu.

El guionista de 'El Orfanato' o 'Lo Imposible' cuenta otra vuelta col sofitu de los productores Belén Atienza, Sandra Hermida y Jesús de la Vega.

L’estrenu diba ser esti añu, pero’l coronavirus camudó los planes de la plataforma Netflix, qu’anque nun aveza cuasi a informar sobre’l proyectu, yá adelantó qu’ufiertará 10 capítulos de 50 minutos caún. ​