RTPA fomenta la igualdá con dos formatos multipantaya

La cadena estrena 'Iguales' y el primer diccionariu audiovisual de la igualdá

RTPA col sofitu del Gobiernu del Principáu d'Asturies y el Ministeriu de la Presidencia, Relaciones coles Cortes y Igualdá pon en marcha dos formatos multipantaya pa televisión, radio y Internet coles mires de promover la igualdá como parte fundamental de la llucha escontra la violencia de xéneru.

Col títulu 'Iguales' llánzase un programa pa televisión y Internet y un diccionariu audiovisual pa televisión, radio y Internet. Dos formatos pioneros que RTPA va poner tamién a disposición de la comunidá educativa.

'Iguales' ye un programa de RTPA sobre la igualdá ente homes y muyeres, un espaciu que nos convida a mirar el mundu d'otra manera y a cavilgar sobre la esperiencia y la realidá na que vivimos.

A lo llargo de 13 capítulos, l'espaciu que se va emitir los sábados y domingos, va transitar per conceutos, creencies y estereotipos coles mires de cavilgar sobre cuestiones de xéneru.

El segundu de los programes ye un diccionariu audiovisual de la igualdá y la llucha escontra la violencia de xéneru empobináu a tolos públicos. Un microespaciu de curtia duración que se va emitir a lo llargo de la programación de RTPA, en RPA y en TPA. Amás, les pieces van ser asoleyaes na web y nes redes sociales.