Teatru pa potenciar y reivindicar la ruta maliaya del acebache

El Principáu yá ta rematando la declaración de Bien d'Interés Cultural

L’Asociación d’Arqueoloxía Industrial de Villaviciosa reivindica revalorizar la cultura del acebache asturiano. El colectivu ta contentu cola viniente declaración de BIC del acebache como patrimoniu inmaterial, pero tamién quier esplotar los recursos económicos y turísticos d’esti mineral pela contornada de les mines d’Oles y Les Mariñes de Villaviciosa.

L’Asociación d’Arqueoloxía Industrial entamó una visita guiada y teatralizada pela contornada de les mines d’acebache d’Oles y Les Mariñes de Villaviciosa pa protexer y impulsar la cultura d’ún de los minerales más valiosos d’Asturies.

Precisamente, el Gobiernu del Principáu yá ta rematando la declaración de Bien d’Interés Cultural del acebache pa garantizar la so protección, pero’l colectivu maliayu tamién quier impulsar los recursos turísticos y económicos d’esti mineral afitando la ruta maliaya del acebache, creando un centru d’interpretación y impulsando campus universitarios.

El colectivu maliayu siempres destacó la importancia comercial y económica de l’acebachería dientro del territoriu asturianu.