Torazu rinde homenaxe a la boroña de forna

Les restricciones impiden la celebración del festival

En Torazu, en Cabranes, güei ríndese tributu a un productu emblemáticu: la boroña de forna. Les restricciones impiden que se celebre’l Festival, pero non que se pongan a la venta raciones d’esti productu.

Tal y como facíen los sos antepasaos, y dempués del parón del añu pasáu, en Torazu güei volvieron a arroxar la forna pa preparar 19 pieces de boroña. Ensin festival, poles restricciones sanitaries, los vecinos decidieron vender 240 raciones.

La tradición de cocer la boroña nes antigües fornes con ablanu delles hores remóntase a tiempos mui llonxanos, pero güei mozos como Hugo Costales garanticen el relevu xeneracional.

Por un preciu de 15 euros cada ración, d’aproximadamente un kilo, acompañada del renomáu arroz con lleche de Cabranes, los fieles nun quixeron perdese una cita qu’aspira, l’añu qu’entra, a recuperar la so condición de festival gastronómicu, si la situación sanitaria dexa.