Un documental amuesa la parte más humana del Parque Nacional de los Picos d'Europa

Rodáu pol cineasta Tom Fernández y producíu por RTPA

'El Parque Humano' ye'l títulu del documental sobre'l centenariu de la creación del Parque Nacional de los Picos d'Europa.

Ye un trabayu de cuasi una hora de llargor rodáu pol cineasta uvieín Tom Fernández y producíu pola Radio Televisión Pública Asturiana.

Nél, habitantes y espertos analicen dellos aspectos de la vida y la natura de los Picos d'Europa.

En 57' el director invítanos a pasear pel so paisaxe y la so xente. Pastores, campesinos, biólogos, historiadores, xeólogos, ente otros espertos, analicen la vida y la natura nesti espaciu protexíu.

Según cuntó'l conseyeru de Presidencia y Participación Ciudadana, Guillermo Martínez, el documental amuesa la "espectacularidá" d'un parque nacional centenariu al traviés d'imáxenes n'alta definición y de calidá cinematográfica y da a conocer perspectives poco conocíes gracies a imáxenes captaes por drones.

Pela so parte, el director xeneral de RTPA, Antonio Virgili, conseñó que'l documental "quier amosar tola guapura y maxestuosidá de la natura del parque" y facer un homenaxe a quien vive ellí y siéntelo como so.

TPA prevé emitilu enantes de qu'acabe l'añu y tamién sedrá difundíu en centros educativos.