Una esposición amuesa les cares de la ciencia en 150 billetes y monedes

Quier visibilizar les aportaciones de les persones que contribuyeron al desenvolvimientu de la investigación

La Universidá d'Uviéu inauguró esti xueves 'Les cares de la ciencia en 150 billetes y monedes', una esposición que va poder visitase hasta'l 30 de mayu nel Edificiu Históricu y que quier visibilizar les aportaciones de los homes y muyeres que contribuyeron al desenvolvimientu de la investigación nel mundu.

L'amuesa, formada por orixinales de la colección de la Universidá d'Uviéu y por reproducciones procedentes de 40 países, pon cara a un centenar de personalidaes que contribuyeron a la meyora científica.

L'apertura d'esta esposición cuntó cola asistencia de los vicerrectores d'Investigación y Estensión Universitaria y Proyección Cultural, Antonio Fueyo y Carmen Adams, y del comisariu de la esposición, el profesor de Ciencies de la Educación José Manuel Montejo.