Zapico recrea la hestoria de la capiya de San Esteban d'El Natahoyo na so última obra

Luis Buznego ye l'autor y guionista de la hestoria

La hestoria de la capiya de San Esteban d'El Natahoyo cúntase al traviés del cómic. Alfonso Zapico ilustra esta obra impulsada pol Club Rotario de Xixón pa recaldar fondos pa rehabilitar esti edificiu que se va convertir n'espaciu cultural tres años d'abandonu y olvidu.

Los trazos inconfundibles d'un contador d'hestories ilustraes. Esta ye la de la capiya de San Esteban del Mar d'El Natahoyo. El que la dibuxa ye Alfonso Zapico. Un retu pa él. Anque paeza increíble, ye la primer vegada qu'un edificiu ye protagonista de los sos llápices, apunta Alfonso Zapico.

Esti cómic ye la hestoria de la recuperación de la capiya de San Esteban d'El Natahoyo. Luis Buznego púnxo-y la lletra pa cuntala.

El club de rotarios de Xixón impulsó la rehabilitación del edificiu. Va convertise n'espaciu cultural. El conceyu va encargase del so caltenimientu. La venta d'esti cómic, a 10 euros, va ayudar a los rotarios a recaldar los 25.000 euros que falten pa recuperar esta capiya d'hestoria ilustrada.