Fina’l mozu que taba ingresáu nel HUCA dempués de ser agredíu nes fiestes de La Florida

La familia de David Carragal pide collaboración ciudadana pa prindar a los sos agresores

La familia de David Carragal, el profesor de 32 años al que dellos mozos agredieron va una selmana n’Uviéu, piden collaboración ciudadana pa prindar a los agresores. El mozu, que taba ingresáu nel HUCA en muerte cerebral, finó esta tarde.

La Policía sigue investigando’l sucesu. Entovía nun se prindó a naide.

Los fechos fueron al rodiu de les 5:00 de la madrugada del llunes pasáu nel barriu de La Florida, cuando acabó la verbena del barriu.

Tres mozos averáronse a la víctima pa pidi-y tabacu. Énte la negativa, entamaron a pegalu faciéndo-y abondes mancadures. Ente elles, un traumatismu craneoencefálicu.