Fina un trabayador nes obres d’acondicionamientu d’un solar en Les Arriondes

Tercer accidente llaboral mortal n’Asturies en namás cinco díes

Un home de 43 años finó esti martes cuando trabayaba nes obres d’acondicionamientu d’un solar asitiáu nel númberu 7 de la cai Argüelles, en Les Arriondes, dempués de cae-y un lladriyu na cabeza en circunstancies que tán investigándose.

Según los datos facilitaos pol Serviciu d’Atención Médica Urxente (SAMU), anque l’equipo médicu de la UVI-móvil de Les Arriondes tuvo practicándo-y maniobres de reanimación una hora finalmente namás pudo confirmar la muerte.

El Centru de Coordinación d’Emerxencies del 112 Asturies recibió l’avisu a les 12:04 y pasó avisu al SAMU qu’unvió l’equipu médicu de la UVI-móvil de Les Arriondes y tamién informó a la Guardia Civil, a l’autoridá llaboral y a la Policía Local.

Ye’l tercer accidente llaboral mortal que se rexistra n’Asturies en namás cinco díes.