Decreten el secretu de sumariu nel asesinatu d'una transexual n'Avilés

La Federación Plataforma Trans espresó "el so más fondu rechazu y pesar énte esti brutal asesinatu"

El xulgáu de guardia d'Avilés decretó'l secretu del sumariu nes investigaciones que se siguen pa esclariar la muerte d'una transexual de 38 años y nacionalidá brasileña. El so calabre foi atopáu ayeri con numberoses puñalaes, según informaron fontes policiales.

El calabre foi alcontráu pola encargada de la llimpieza d'una vivienda allugada nel númberu 62 de la cai La Cámara, nel centru d'Avilés, nuna habitación que la víctima arrendara nel pisu que, según les primeres averiguaciones, funcionaba como casa de cites.

El cuerpu de la víctima, que foi identificáu pol so Númberu d'Identidá d'Estranxeru, nel que figuraba como varón, foi treslladáu yá al Institutu de Medicina Llegal d'Uviéu pa que se-y practique l'autopsia p’afitar la hora de la muerte.

En relación con esti socesu, la Federación Plataforma Trans espresó nun comunicáu "el so más fondu rechazu y pesar ante esti brutal asesinatu con clares connotaciones d'odiu que vien engrosar los crímenes machistes que yá golpeen a les muyeres".