Conderguen al Hospital de Xove pola muerte del mozu sanitariu que morrió por COVID en 2021

La sentencia obliga a indemnizar a los padres del mozu xixonés con 257.954,68 euros

El Tribunal Cimeru de Xusticia d’Asturies condergó a la Fundación Hospital de Xove pola muerte del mozu sanitariu Pablo Riesgo que morrió’l 7 de febreru de 2021 dempués de contaxase de COVID-19 meses enantes. L’altu tribunal afita asina la sentencia del Xulgáu de lo Social númberu 3 de Xixón y obliga a la Fundación y a Seguros Bilbao, como aseguradora del centru hospitalariu, a indemnizar a los padres del mozu xixonés con 257.954,68 euros.

Pablo Riesgo, de 26 años, yera técnicu en cuidaos auxiliares d’enfermería y dende xunu de 2020 foi encadenando contratos nel Hospital de Xove, onde tuvo asignáu al área d’Urxencies dellos meses, en plena pandemia de COVID-19. La sentencia del TCXA afita que la muerte del mozu nun foi "por fechos imprevisibles, inevitables y ayenos a la empleadora" y acusa al hospital xixonés de "incumplimientos empresariales" venceyaos cola normativa de riesgos llaborales. Asina lo afitó tamién un informe fechu pol Institutu Asturianu de Prevención de Riesgos Llaborales que se presentó nel xuiciu. De fechu, l’autu apunta a que’l mozu sometióse a un únicu reconocimientu médicu y foi en xunu de 2020, col entamu del so primer contratu.

El sanitariu contaxóse de COVID el 27 d’ochobre de 2020. La enfermedá provocó-y una neumonía billateral pola que tuvo que tar hospitalizáu 12 díes nel mesmu centru sanitariu nel que trabayaba. Tuvo dos meses de baxa llaboral. Nesi periodu, y nuna entrevista a TPA Noticies, Riesgo comentó que siguía con secueles: cansanciu, fatiga y tos persistente. De fechu, la propia sentencia del Tribunal de lo Social de Xixón incluye eses declaraciones como parte del so argumentariu pa xustificar la condena al hospital.

El 29 d’avientu de 2020 inxertóse otra vuelta al so puestu de trabayu nel Hospital de Xove a pesar de nun tar recuperáu dafechu y, namás un mes más tarde, volvió a necesitar atención sanitaria. Foi al serviciu d’Urxencies onde-y punxeron un tratamientu ambulatoriu. Díes dempués yera hospitalizáu. La gravedá del so estáu obligó a llevalu a la UCI del HUCA’l 6 de febreru de 2021 y ellí morrió al día siguiente por mor d’un "fallu multiorgánicu con parada cardio-respiratoria irreversible". Los informes médicos asitien la causa fundamental de la muerte na propia infección por COVID-19 y el tratamientu de corticoides que necesitó.