Prindáu por percorrer nueve kilómetros de l'A-66 pela carril contraria

L'home ye un vecín de Mieres de 80 años

La Guardia Civil prindó a un vecín de Mieres de 80 años dempués de qu'ayeri circulara col so vehículu en sen contrariu nueve kilómetros pela autovia A-66, de Mieres a L.lena, y chocara escontra otru turismu, al que causó dellos daños materiales.

Tres declarar, el supuestu 'kamikaze' foi puestu en llibertá tres abri-y dilixencies por un delitu escontra la seguridá vial por conducción temeraria, según confirmó un voceru de la Comandancia de la Guardia Civil d'Uviéu.

L'home viaxaba solu nun Volkswagen Polo, de color gris, cuando a les 7.45 hores d'ayeri foi detectáu circulando pela carril contraria, na plataforma de Xixón a Leión, ente los kilómetros 49 a 58 de l'A-66 nun momentu de gran intensidá de tráficu.

En recibiendo l'avisu d'otros conductores, una patrulla del destacamentu de Tráficu de Mieres foi a l'A-66 y trató de da-y l'altu pa que parara'l vehículu, pero'l conductor nun fizo casu y llegó a circular tres kilómetros en paralelu al vehículu policial que diba alvirtiéndolu de que frenara con lluces y serenes, según desplicaron testigos presenciales.

Na so trayectoria, el supuestu kamikaze provocó momentos de gran tensión, al obligar a otros conductores a estremar los sos vehículos, sobre manera camiones qu'a esa hora circulaben pela A-66, y dalgunos de los que sufrieron daños materiales, como raspadures y rotures d'espeyos retrovisores.

Dos axentes del destacamentu de Tráficu de Mieres llograron finalmente adelantar al Volkswagen y da-y l'altu, a pie, dellos metros más p'alantre, cuando yá taba na salida de La Pola.

L'home foi prindáu y treslladáu a dependencies policiales, onde al paecer desplicó que circuló en sen contrariu “por un tracamundiu”, según indicaron fontes de la Benemérita.