La Guardia Civil inspecciona’l barcu de Javier Ardines en busca de pruebes

Sigue la toma de declaraciones al círculu familiar, a los collacios y a los vecinos

El 'Bramadoria', el barcu del conceyal Javier Ardines, y nel que salía a faenar, foi inspeccionáu esta mañana dafechu por axentes de la Guardia Civil.

Acompañaos d’unu de los dos marineros colos que trabayaba Ardines, revisó cada centímetru en busca de dalguna prueba o niciu que los ayude a resolver esti crime. Pruebes que, xunto a les yá algamaes, tienen intención d’unviar a Madrid p’analizales.

Los axentes siguen tomando declaración al círculu familiar del conceyal asesináu y a los sos
collacios. Esta mañana volvieron tamién a falar colos vecinos de la zona más a la vera de la vivienda familiar d’Ardines.

Toles llinies d’investigación, insisten, tán abiertes. Enagora, los testimonios recoyíos malapenes dieron lluz sobre lo que pudo pasar esa madrugada del xueves na que’l conceyal d’Izquierda Xunida apaecía asesináu.

Namái ún de los vecinos dixo sentir una conversación, en voz alta, y a los sos perros lladrar.

Mientres, van sucediéndose les muestres de sofitu a la familia y d’homenaxe a Javier Ardines, con dellos actos en Llanes.