Una ventena de mancaos leves nuna esplosión pirotécnica en Cangas

La esplosión foi provocada por un fallu al tirar un volador

Una ventena de persones resultaron mancaes leves en Cangas nuna esplosión pirotécnica provocada por un fallu nel llanzamientu d'unu de los voladores, dientro de los festexos de La Madalena.

La esplosión, que socedió pasada la medianueche, provocó la frañedura de los cristales d'un gran númberu de viviendes y comercios, según confirmó l'alcalde de Cangas, José Víctor Rodríguez Fernández.

Según esplicó'l rexidor, la esplosión foi provocada por un volador que, por cuenta de la so mala trayectoria, cayó sobre la zona na que taba almacenáu'l restu'l material pirotécnico preparao pa la nueche.

Munchos de los mancaos fueron pelos sos propios medios al hospital Carmen y Severo Ochoa.

Rodríguez Fernández, quien reconoció que foi un "plasmu grande", punxo en valir el plan de seguridá programáu pol Conceyu con motivu del llanzamientu de los voladores, qu'establez un perímetru de seguridá mayor al qu'obliga la llei.

Dende'l primer momentu punxo en marcha tola maquinaria del plan de seguridá coordinando y doblando efectivos de bomberos, Policía Local, Guardia Civil y servicios sanitarios.

Amás, el Conceyu habilitó una oficina p'atender a los vecinos afectaos poles estroces causaes.

Los afectaos tienen qu'interponer una primer denuncia énte la Policía Local onde s'informa de los pasos que tienen que dar pa que los seguros se faigan cargu de los desperfectos.

Son cientos los afectaos, munchos nun taben en Cangas esta nueche y vinieron hasta'l llugar tres enterase de lo asocedío.