Un total de 15 alumnos de FP representen a Asturies nel campeonatu Spain Skills

Son los vencedores de la fase autonómica, que se celebró'l 13 de xineru

Un total de 15 estudiantes de Formación Profesional (FP), procedentes de siete centro educativos, representen a Asturies na prueba de destreces técniques Spain Skills, que tien llugar en Madrid. El Principáu participa nesta edición con una delegación de 30 persones, ente estudiantes, tutores y xefes d'equipu.

Esta iniciativa, promovida pol Ministeriu d'Educación, Cultura y Deporte, constitúi un pervalible preséu divulgativu de la FP y un mediu pa estimular a alumnáu, profesoráu y empreses, informa'l Gobiernu rexonal.

Tamién ufierta una plataforma d'intercambiu sobre la evolución de los estándares profesionales, la calidá y l'anovación nos distintos sectores productivos.

Los alumnos que compiten en Madrid son los vencedores de la fase autonómica, que se celebró'l 13 de xineru nos centros integraos de FP d'Hostelería y Turismu, Llaboral y Avilés, y van representar a Asturies en 14 especialidaes.