Radiotelevisión del Principáu d'Asturies Radiotelevisión del Principado de Asturias
Webcams Viernes 23 de febrero | Corporativo | Contacto |
Notas de voz al 666 333 222
Buscar |
Síguenos en
Radiotelevisión del Principado de Asturias
RTPA - Radiotelevisión del Principado de Asturias
Fuente: RTPA, 24 de marzu. 2017 21:36

Asturies llevanta los acotamientos al pastoréu de fasteres quemaes

Bosque quemado
Asturies llevanta los acotamientos al pastoréu de fasteres quemaes

Les sanciones por tener ganáu pastiando en fasteres acotaes quedarán ensin efectu

El plenu del Parllamentu asturianu aprobó güei una modificación de la Llei de Montes que dexará medrar l'aprovechamientu de los praos quemaos y qu'unes 15.000 hectárees qu'anguaño tán acotaes puean ser usaes polos ganaderos darréu.

Les sanciones vixentes a ganaderos por tener ganáu pastiando en fasteres acotaes tamién quedarán ensin efectu cola entrada en vigor d'esta modificación normativa, una midida pionera n'España y impulsada pol PP que cuntó col respaldu de los demás grupos parllamentarios, menos Podemos, que votó a la escontra.

Asina, dende agora, l'acotamientu al pastoréu namái se va aplicar en fasteres quemaes d'árboles y aprovechamientu pa madera y el propietariu del monte quemáu tendrá la responsabilidá de llendalu pa nun dexar la entrada del ganáu.

Los ganaderos dicen que la modificación de la llei "acaba con una inxusticia histórica".

El debate y la votación de la iniciativa siguiólu un grupu de ganaderos. Dalgunos d'ellos concentráronse fuera la Xunta Xeneral con pancartes cola lleenda Asturies Ganadera.

Otru grupu siguió'l trámite parllamentariu dende la tribuna de convidaos de la cámara autonómica, onde hebo aplausos cuando s'aprobó la modificación de la llei.

Dende l'añu 2000, n'Asturies acotáronse más de 33.000 hectárees, qu'equivalen a tol conceyu d'Ibias. Anguaño siguen acotaes unes 20.000, más que tol conceyu de Xixón. Pero si miramos los datos per años, vemos que la midida namái s'aplicó de manera notable dende 2012, tres la grave quema del Valledor. Ye dicir, que les vedes al pastoréu en fasteres quemaes duró cinco años, los mesmos que la llucha ganadera escontra la midida.

Según les investigaciones, les más de les quemes forestales qu'hai n'Asturies son a querer cola motivación de rexenerar pastos. Sicasí, los ganaderos siempre interpretaron l'acotamientu como una especie de castigu. Denuncien que los arruina y que los espón a multes por incumplimientu difíciles d'evitar.

L'alministración siempre aseguró que la midida buscaba namái la rexeneración del monte. La Conseyería llevó a les comparecencies parllamentaries hasta cinco informes técnicos diferentes nos que botánicos, inxenieros de monte y xeólogos defendíen la necesidá de los acotamientos y sollertaben de la grave erosión que les quemes siguíes tán provocando.

En nada 15.000 hectárees quemaes reabriránse al pastoréu. Los grupos ecoloxistes entamaron el procedimientu pa pidir a la Xunión Europea que quite les ayudes al desendolcu rural neses fasteres. Aseguren que dende agora nun se cumple unu de los requisitos pa recibiles, el de procurar la rexeneración del monte.

Comparte esta noticia
banner publicidad

© 2022 Radiotelevisión del Principado de Asturias | Todos los derechos reservados

Publicidad | Aviso Legal | Política de privacidad | Política de cookies | Consentimiento de cookies | RSS | Sobre RTPA | Entidad adherida a AUTOCONTROL