La Facultá de Psicoloxía busca a muyeres embaranzaes o en pospartu que quieran dexar de fumar

Un tratamientu psicolóxicu, ensin fármacos, p'amenorgar el consumu de tabacu de forma gradual

La Facultá de Psicoloxía de la Universidá d'Uviéu busca a muyeres embaranzaes, o en pospartu d'hasta un añu, que quieran dexar de fumar. Propón-yos un tratamientu psicolóxicu, ensin fármacos, p'amenorgar el consumu de tabacu, de forma gradual, y ensin pasalo mal. D'otra manera, señalen, la mayoría solo amenorga a 10 pitos al día de primeres del embaranzu. Enfótense n'algamar el 80% d'ésitu, que llograron col so programa en población xeneral.

Una de cada cuatro fumadores embaranzaes nun lo dicen a la matrona. La mayoría de les que quieren dexalo, consiguen amenorgar el consumu a siete o 10 cigarros diarios.

Con esti tratamientu, l'amenorgamientu ye gradual nes tres primeres selmanes. Busquen acabar con riesgos, dende'l baxu pesu del ñácaru al nacer, a una peor recuperación pospartu.

Van pasando progresivamente a marques con menos cantidá de nicotina. Y rexístrase, con un aparatu, cómo va baxando esi consumu de tabacu.

Nes dos selmanes siguientes, van trabayar colos psicólogos les situaciones que puen ayudar a la recaída, bien habitual nel pospartu.

Sara Weidberg, coordinadora del Tratamientu psicolóxicu del Tabaquismu n'embaranzaes o en pospartu sorraya que los beneficios de dexar el tabacu siempres compensen l'ansiedá que pudiera provocar na madre. Otra creencia errónea, diz, ye nun dar el pechu si se vuelve fumar.

Ñácaros y pareyes van ser bienveníos a les sesiones.

Ye bien posible qu'elles tamién, apunta, s'animen a dexar de fumar.