Esti domingu caducaría la concesión inicial a Aucalsa que se fixo cola contrucción y la esplotación de l'Autopista d'El Güerna. El so contratu foi ampliáu hasta l'añu 2050 pol gobiernu d'Aznar con Francisco Álvarez-Cascos como ministru de Fomentu.
Inaugurada n'agostu de 1983, l'autopista d'El Güerna significó un saltu de xigante na comunicación d'Asturies cola meseta. Nos sos cuasi 87 kms de percorríu, cuasi una ventena traviesen túneles.
L'autopista d'altu monte supunxo un finxu d'inxeniería. La ponte atirantada sigue dibuxando'l paisaxe sobro'l banzáu de L.luna. Los asturianos tuvieron que pagar pol so usu dende'l primer día. Unes 785 pesetes, qu'al cambéu, anguaño, raspiaríen los cinco euros. Y 38 años dempués, facer el trayectu completu ente'l Principáu y Lleón cuesta güei 13,50 euros.
Podemos denunció qu'equí tampoco se sacó a llicitación pública. La patronal del tresporte encamienta guardar tolos xustificantes de pagu a partir d'esti llunes.
Los presupuestos xenerales del Estáu recueyen
una partida de 9.000.000 d'euros pa bonificaciones de l'A-66. Ye un 50% más que la cuantía del añu pasáu, pero que queda bien lloñe de los 55.000.000 d'euros destinaos a l'AP-9 de Galicia.
© 2024 Radiotelevisión del Principado de Asturias | Todos los derechos reservados
Publicidad | Aviso Legal | Política de privacidad | Política de cookies | Consentimiento de cookies | RSS | Sobre RTPA | Entidad adherida a AUTOCONTROL