Claudio Fernández, el comerciante moscón que nun pue alloñase del negociu familiar

Les sos vivencies y anécdotes conviértenlu nuna especie d'enciclopedia oral de Grau

Hasta rexentar de mano una carpintería y dempués la so propia tienda de muebles, el comerciante moscón, Claudio Fernández fizo, cuasi de too. Lo mesmo repartía paquetes per Grau, que vendía tabacu y pasteles peles romeríes. Tamién facía galletes na popular fábrica, 'Casa La Gilda'.

Claudio tamién forma parte de la historia del yá desapaecíu 'Cine Rada de Grau'. Ellí trabayó de porteru y acomodador, xera que compaxinaba cola so carpintería. Les vivencies d’aquella dómina daríen pa un llibru.

Muncho camudó la villa dende entós y tamién la forma de facer negocios. Esti emprendedor piensa que daquella yera igual de difícil qu’agora. Eso sí, entós vendíase con bastante más facilidá.

Anque agora la so fía Sagra la que ta al frente del negociu familiar, Claudio sigue llevando’l timón. Va caldía pa revisar, o más bien dirixir, pidíos, compres y entregues. Tamién ye un vezu velu al volante de la so furgoneta. La vida de xubiláu nun va con él.

Trabayu y sacrificiu son les máximes de Claudio Fernández. Tamién la bona compañía, diz, que nada sedría lo mesmo ensin Amparo, la so muyer yá muerta. Claudio toca madera pa siguir cruzando esta puerta munchos años más.