El Gobiernu identifica alternatives a les centrales térmiques n’Asturies

Teresa Ribera recibió de dalgunes plantes "propuestes mui interesantes y alternatives identificaes"

La vicepresidenta cuarta del Gobiernu y ministra pa la Transición Ecolóxica y el Retu Demográficu, Teresa Ribera, comentó que recibió de les empreses titulares de dalgunes plantes "propuestes mui interesantes y alternatives identificaes" énte’l pieslle de les centrales térmiques n’Asturies.

Ribera respondió asina a la entruga sobre transición xusta fecha esti miércoles nel Congresu pol diputáu de Foro Asturies, Isidro Martínez Oblanca, que planteó que nel últimu añu destruyéronse 5.000 trabayos nel sector pol pieslle, ente otres, de les centrales térmiques de Lada y Soutu.

La ministra recordó que’l Gobiernu axústase a "determinaes llendes ambientales" de cumplimientu obligáu pola Xunión Europea (XE), venceyaes col cambéu climáticu, la minería y les centrales de producción d’electricidá al traviés de combustión de carbón, gasoleu o gas.