El Muséu de la Sidra de Nava celebra'l so 25 aniversariu

Gran programa d'actos, qu'acaba con un tributu al arte del escanciáu

El Muséu de la Sidra de Nava, qu’estos díes celebra’l so 25 aniversariu con un gran programa d’actos qu’acabarán mañana con un tributu al arte del escanciáu, acoyó esti mediudía una charra y una cata na que los asistentes pudieron conocer y prebar un gran abanicu de les variedaes de sidra qu’enagora se fai n’Asturies, dende lo natural hasta lo de xelu.

L’encargáu de dirixir la cata foi l’enólogu maliayu Tano Collada, que dempués d’una introducción al rodiu del sector sidreru tanto nacional como internacional pasó a describir les característiques de la sidra que se produz n’Asturies dende la fase visual a la olfativa y gustativa.

Na preba, inxerta na conmemoración de los 25 años del Muséu de la Sidra de Nava, participaron al rodiu de 20 persones con ganes de saber más de la nuestra bébora más típico.

La reconocencia al arte del escanciáu, daqué imprescindible y propio de la cultura sidrera asturiana, candidata española a la llista del Patrimoniu Mundial Inmaterial de la Unesco, sedrá’l ramu al cumpleaños del muséu navetu.