El Principáu va aplicar zarros y restricciones según la evolución de cada conceyu

Va asoleyar un llistáu diariu de los conceyos que se vean afectaos por nueves midíes

El Gobiernu d'Asturies va asoleyar un llistáu diariu de los conceyos que se van ver afectaos por nueves restricciones, como zarros perimetrales, la llende de xuntes a cuatro persones, la clausura del interior de los chigres y los centros comerciales, sacantes tiendes d'alimentación, y la suspensión d'actividaes deportives en recintos zarraos.

Asina lo aseguró esti sábadu'l conseyeru de Salú, Pablo Fernández, qu'esplicó que'l llunes asoleyará'l resolvimientu qu'afita los parámetros básicos, como la incidencia acumulada, la qu'afecta a los mayores de 65 años y la trazabilidá del virus, que van afitar la puesta en marcha d'estes acciones restrictives en cada conceyu.