La defensa de responsables de les subvenciones d’UXT pide’l sobreseimientu

L’abogáu Javier Núñez Seoane aseguró que nun hai materia delictiva nes actuaciones

La defensa de dos de los responsables del control de les subvenciones qu’UXT-Asturies recibió polos cursos de formación ente 2010 y 2014 pidirá’l sobreseimientu de la causa al ver qu’hai "graves errores" nel autu de la xuez pol que fueron procesaos xunto a otros cuatro ex-dirixentes y técnicos pol presuntu esvíu de fondos al sindicatu por importe de 1,46 millones d’euros.

Ente los seis procesaos ta’l que fuere secretariu xeneral d’UXT hasta 2016, Justo Rodríguez Braga, que tuvo al frente de la organización sindical dieciséis años.

L’abogáu Javier Núñez Seoane, qu’exerce la defensa de Manuel Díaz Cancio, secretariu de formación ente 2009 y 2013, y del técnicu Alberto González Castaño, encargáu de la contabilidá del sindicatu y del control y xustificación de les subvenciones, aseguró que nun hai materia delictiva nes actuaciones y namás “simples discrepancies” nos importes de costos subvencionables, lo qu’en nengún casu sedría una cuestión penal.

El lletráu afirmó que nun hai nenguna prueba qu’afite la imputación dempués de les abondes dilixencies feches nos cinco años d’instrucción onde se practicaron rexistros y se llevaron alantre prindamientos que calificó como “inxustificaos”.