La quesería La Huertona remata'l so inxerimientu na Denomación d'Orixe Protexida Gamonéu

La Huertona cuntará en pocos meses cola so lleche de vaca, cabra y oveya xunto a una cueva de maduración

La quesería La Huertona, asitiada en Benia (Onís), y que enagora fai quesu tres díes a la selmana, produxo les sos primeres pieces allá pel mes d’agostu. Pieces de dellos tipos que salieron al mercáu a primeros d’avientu.

Esi mesmu mes entamaron a facer unes pieces de quesu, qu’enagora maduren na Cueva de Quiliama y coles qu’aspiren a algamar les certificaciones y permisos del Conseyu Regulador de la Denomación d’Orixe Protexida Gamonéu y dase asina d’alta como productores de la variedá del valle.

Del procesu de fechura encárgase’l maestru queseru Elías Rodríguez, llegáu dende Venezuela, y instaláu n’Onís cola so familia. El Gamonéu del valle de La Huertona, asegura, axustaráse a tolo que s’esixe nel reglamentu de la Denomación d’Orixe Protexida, pero tamién quier dir más allá.

Apuesten por caltener lo artesano, pero quieren dar una evolución al quesu Gamonéu. Na so apuesta pola anovación, en La Huertona apostaron por un sistema d’afumáu ensin fumu pal so quesu, una novedá no que cinca a la producción del Gamonéu.

Na sala de fechura destaca una pantalla táctil dende la que se manexa un programa que dexa controlar tolo que tien que ver cola producción y el control de calidá de les sos variedaes de quesu.

Nunos meses, y cuando tengan preparada la so nueva esplotación ganadera, la quesería La Huertona cuntará cola so lleche de vaca, cabra y oveya xunto a otru equipamientu fundamental: una cueva de maduración.

Na so apuesta pol entornu rural y pol quesu Gamonéu, la puesta en marcha de la quesería La Huertona dexó crear, enagora, dos puestos de trabayu nel conceyu d’Onís. Y sedrá dalgunu más cuando entre en funcionamientu la so ganadería.