La vocación de los docentes ye una de les fortaleces del sistema educativu escandinavu

Entrevista al rector de la Universidá de Ciencies Aplicaes del Sudeste de Finlandia

El rector de la Universidá de Ciencies Aplicaes del Sudeste de Finlandia afirma que la vocación de los docentes ye una de les fortaleces del sistema educativu escandinavu. La so universidá ye una de les participantes na alianza Ingenium que s'axunta estos díes n'Uviéu.

Heikki Saastamoinen ye consciente de la reputación de la educación nel so país y apunta cuáles son les sos fortaleces. El sistema curia enforma la educación dende abaxo.

"Los neños pequeños van pocu tiempu a clas, cuatro hores y solo tán dientro 45 minutos, dempués siempres se fai una posa de 15 minutos. Salen, xueguen y asina cuando vuelven puen concentrase no que diz el profesor", esplica'l rector.

Tamién destaca que'l de profesor ye un trabayu bien respetáu al que se llega por vocación. Ensin ella, sorraya, nun ye posible llograr bones resultancies. "La xente que quier ser docente realmente quier enseñar. Eso ye bien importante. Ye amás un trabayu desafiante, pue ser bien estresante y si nun ye lo que realmente quies nun vas durar faciéndolo", apunta Saastamoinen.

Y too ello fai, diz, que los estudiantes lleguen bien formaos a la universidá. La qu'él dirixe, de 11.000 alumnos y 660 profesores, ye de ciencies aplicaes.

Un retu común a España ye medrar la presencia femenina nestos estudios.

Gracies a l'alianza Ingenium, qu'acaba d'entamar, espera que los universitarios asturianos vayan ellí.