Los gatos caleyeros entamen a ocupar espacios qu'hasta agora-yos taben vedaos

A estes altures del añu yá se tendría qu'entamar a prindar a les gates pa esterilizales

El confinamientu tien consecuencies nel comportamientu de la fauna qu'habita nes nueses ciudaes. Un exemplu ta colos gatos caleyeros que tán empezando a ocupar espacios qu'hasta agora-yos taben vedaos.

Asina lo asegura Elena Vigil, voluntaria de l'Asociación Gijón Felino. El decretu d'estáu d'alarma dexa a esta voluntaria saltase'l confinamientu p'atender a una de les colonies de gatos rexistraes pol Conceyu de Xixón. Un día de cada tres, Elena sal de la so casa p'alimentar a una colonia de gatos del barriu de Nuevo Xixón.

L'estáu d'alarma llegó nun momentu clave no que cinca al llabor que se fai nestes colonies. A estes altures del añu yá se tendría qu'entamar a prindar a les gates pa esterilizales, pero la campaña ta parada.

La menor presencia humana nes cais ta provocando, amás, un cambéu nel comportamientu de los gatos caleyeros.

La fauna urbana gana terrén, polo menos, de forma temporal, al ser humanu.