Aumentu de la morosidá y paralización de les reformes nes comunidaes de vecinos

Los alministradores de finques piden que les xuntes virtuales se consideren llegales

Les restricciones pola pandemia torgaron que se celebren ocho de cada 10 xuntes de comunidaes de vecinos n'Asturies, según les estimaciones del Colexu d'Alministradores de Finques. Estos profesionales noten un aumentu de la morosidá y una paralización de les reformes nos edificios pola imposibilidá de tomar decisiones conforme a la llei, que solo dexa xuntes presenciales.

Dende marzu, les midíes sanitaries enzancaron la celebración de xuntes de propietarios, sobre manera n'inmuebles con munchos vecinos. Agora, coles restricciones reforzaes en dellos conceyos, estes xuntes presenciales son imposibles.

Los alministradores de finques aseguren que la morosidá aumentó, y non tanto polos problemes económicos de les families, sinón ente aquellos que yá enantes de la pandemia nun taben al día nel pagu de la comunidá.

Dende'l Conseyu Xeneral de Colexos d'Alministradores de Finques piden al Ministeriu de Xusticia'l cambéu urxente de la normativa pa considerar llegales les xuntes virtuales y les decisiones que se tomen nelles, una regulación que yá s'aplica en Cataluña.

Anque sí puen tomase decisiones ensin pasar per una xunta en casu d'arreglos urxentes, el restu d'obres n'edificios paralizáronse énte la falta de toma de decisiones, según los alministradores. Ye'l casu de reformes n'ascensores, fachaes y instalaciones eléctriques, que tamién suponen un amenorgamientu na actividá económica pa les empreses del sector.