Ente la documentación presentada pola empresa Abei Energy pa entamar el procedimientu d'evaluación d'impactu ambiental apaecen les zones de pesca que se veríen afectaes pola instalación del Poniente I y del Poniente II. Amás figuren reflexaes les zones de pesca que cruzaríen los cables eléctricos submarinos na so trayectoria hasta Galicia. Situación y diseñu que nun gustaron a los pescadores, como esplica Adolfo García, presidente de la Federación de Cofradíes de Pescadores del Principáu d'Asturies.
El proyectu recueye les zones d'interés ambiental. Nel interior del área d'estudiu ven Zones d'Especial Protección d'Aves y Zones d'Especial Caltenimientu. Al allugar el Poniente I nel mapa vemos que tán pegaos. Ye'l sistema de cañones submarinos d'Avilés. Esplícalo Nicolás López, delegáu de SEObirdLife n'Asturies.
Un estudiu que nun afita, como reclamen pescadores y ecoloxistes, una evaluación del efectu multiplicador y adversu qu'aseguren va tener la cercanía ente sí de los dos parques eólicos marinos. Lláma-yos l'atención que'l proyectu se tramite como un únicu espediente cuando ye un macroparque, dicen, capaz de xenerar la mesma potencia que la llograda por tolos aeroxeneradores de tierra instalaos na comunidá.
L'impactu de lo éolico marino sobre l'actividá pesquera ye tamién una esmolición pa la Federación Nacional de Cofradíes. Esti organismu acaba de pidir per escrito al Ministeriu d'Agricultura qu'estudie les consecuencies de los parques eólicos sobre costes y caladeros.
© 2024 Radiotelevisión del Principado de Asturias | Todos los derechos reservados
Publicidad | Aviso Legal | Política de privacidad | Política de cookies | Consentimiento de cookies | RSS | Sobre RTPA | Entidad adherida a AUTOCONTROL