Namás una concesión de les 39 centrales hidráuliques acaba anguaño

L'Estáu namás podría rescatar seis n'Asturies no que queda de década

Namás una concesión de les 39 centrales hidráuliques qu'hai n'Asturies ta próxima a acabar. Asina lo confirma la Confederación Hidrográfica del Norte, encargada d'esti tipu d'autorizaciones. El primer vencimientu sedría'l de la central de Cauxa, perteneciente a la compañía Hidrolena, que caduca anguaño. El gruesu de les concesiones van acabar a lo llargo de la década de 2030.

L'Estáu namás podría rescatar seis centrales hidráuliques n'Asturies no que queda de década. De les 39 esistentes toes tienen per delantre dellos llustros de xestión en manes privaes. La xestión pública de les concesiones que vayan caducando ye la opción espresada esta selmana pola ministra pa la transición ecolóxica col envís de rebaxar el preciu de la lluz.

Sicasí, el procesu sedría bien llargu nel tiempu. Anguaño remata'l plazu concesional de la minicentral de La Cauxa, en Miranda. Hasta 2025 nun se daríen les dos siguientes. Quince concesiones rematen na década de los 30, y 18 a partir d'entós y hasta l'añu 2066.

La potencia hidráulica instalada n'Asturies ye de poco más de 800 megavatios, una cifra mui pequeña en comparanza con otres comunidaes autónomes o otres fontes que xeneren enerxía na rexón.

Solo les centrales de Grandas de Salime y Tañes superen los 100 megavatios. Dambes pertenecen a EDP; la primera, la de Grandas, en consorciu con Endesa. La so concesión remata en 2056 y la de Tañes en 2061.

Repsol cunta con dos grupos de delles centrales que xuntes tamién superen los 100 megavatios. Les centrales d'Arbón y Silvón, nel Narcea, son agora les postreres que van revisar la so concesión n'Asturies dientro de 45 años.