La despensa mundial d'alimentos cunta con 18 productos asturianos

La unviada a Svalbard ye la tercer copia de seguridá de les plantes comestibles

La despensa mundial d’alimentos cunta con 18 productos asturianos. Trigu de Somiedu, llechuga de Gozón, fréxola de Cabrales o cebolla de Villaviciosa son dalgunos de los materiales que yá tán nel Bancu Mundial de Semiente Svalbard.

El monte de xelu de Svalbard abrió les sos puertes pa recibir les primeres 989 variedaes españoles. Les sos cámares frigorífiques arrodiaes de permafrost custodien yá 500 variedaes de semiente de caúna de les muestres unviaes.

La unviada a Svalbard ye la tercer copia de seguridá d’estes plantes comestibles. La primera ta nel Serida y hai una segunda nel Institutu Nacional d’Investigación y Tecnoloxía Agraria y Alimentaria. La idea de caltener esta semiente ye asegurar la nuestra alimentación en casu d’una catástrofe natural.

Con esti unviu, el CSIC amiéstase a les 90 instituciones internacionales que yá depositaron les sos colecciones nesti 'Arca de Noé, col que poder reiniciar la nuestra agricultura en casu d’un cataclismu mundial.