Intelixencia Artificial p’ayudar nel peñeráu de los casos de Covid​

Proyectu de códigu abiertu de Microsoft, nel que participa un inxenieru informáticu asturianu

Usar imáxenes de Rayos X p'atropar munchos datos que xeneren un algoritmu que nos diga la gravedá d'un paciente con Covid y la so evolución. Paez ciencia ficción, pero ye intelixencia artificial. Ye un proyectu que desenvuelve un equipu de la multinacional tecnolóxica Microsoft. Faise dende Cambridge, n'Inglaterra, y ente los investigadores ta un inxenieru informáticu de Samartín del Rei Aurelio.

Ye'l proyectu Inner Eye. Una docena d'investigadores de diverses disciplines trabayen dende fai 10 años nun programa informáticu desenvueltu con Intelixencia Artificial que s'alimenta de datos, en concreto de resultaos de pruebes diagnóstiques. Yá s'aplica n'oncoloxía pa optimizar el tratamientu de radioterapia.

Xenérase un algoritmu. Cuantos más datos, meyores predicciones. Una ventena d'hospitales apurrieron más de 500 TAC de cáncer de próstata y cuasi 300 de tumores en pescuezu. Agora, estudien cómo aplicar al Covid esta tecnoloxía. Tán usando Rayos X de los pulmones pa crear un sistema de cribáu.

Puen decidir rápido si'l paciente necesita ingresar na UCI, amenorgando asina carga de trabayu a los sanitarios.

Tán usando datos apurríos pol Gobiernu inglés y pol Hospital de Birmighan, que foi unu de los que más casos de coronavirus trató. La intención ye combinar les imáxenes médiques con otros datos clínicos pa poder predicir la evolución de los enfermos.

Microsoft fixo códigu abiertu de tol proyectu, de manera que cada institución o hospital puea crear los sos propios modelos de predicción.